Nova edición das xornadas de estudos da historia local, Hume

Este domingo, día 26 chega unha nova edición das xornadas de estudos da historia local, Hume.

Serán tres citas en tres semanas consecutivas, nas que a primeira é xa este domingo, cunha polafía.

Para iso contarase coa colaboura da Asociación de escritoras e escritores en lingua galega, e tamén participarán distintos homes e mulleres de As Pontes que nos contarán historias, lendas, cantarán cancións, e recitarán poesía, ademais de outras aportacións que podan xurdir.

As polafías buscan recrear usos de creación musical e literaria de carácter popular.

As antigas xuntanzas tradicionais adáptanse ós nosos tempos co emprego da tecnoloxía actual.

Será ás seis da tarde e na Sala de exposicións do Mercado vello. Cóntase con viciños e viciñas como Eladio, o cego, Pepe de Rosalía, Toñito do Ferpu ou Maruja da Ibérica, entre outros.

Á semana seguinte, xa o venres, e ás 8 da tarde na Casa Dopeso contarase cuns experto na historia do monte en Galicia e nas repoboacións forestais levadas a cabo nos últimos 70 anos que nos explicará como a xestión do monte pasada e presente ten, entre outras consecuencias, os lumes que padecemos nos últimos anos. A ponencia correrá a cargo de Eduardo Rico e Araceli Freire.

O venres 15 de decembro de novo no Mercado Vello, farase a presentación da revista Hume número 10 e outorgarase o premio de investigación Hume correspondente ao ano 2017.

Cúmprense así 10 anos de xornadas e da publicación consecuente, na que este ano figuran os traballos acreedores do Premio de investigación do 2.016. Un deles cunha comparativa entre o Poboado industrial de As Veigas, e outros semellantes noutras localidades do estado, e outro relativo á árbore xenealóxica do século XVII ó XIX.

Asemade, atoparemos un estudo epigráfico sobre a ara romana que está nos soportais do Concello, e un documento dos aproveitamentos hidroeléctricos en todo o termo municipal.

De feito ós asistentes regalaráselles un mapa coa ubicación de todos os muiños de As Pontes.