As Pontes terá unha sede permanente da UDC

 

  • O alcalde de As Pontes, Valentín González Formoso, asinou co reitor da UDC, Julio Abalde, un convenio de colaboración que ten como obxectivo facilitar o acceso da veciñanza á formación vencellada á sustentabilidade.
  • A primeira colaboración entre a UDC e o Concello de As Pontes chegará da man da Universidade Sénior e o Vicerreitorado de Oferta Académica e Innovación Docente.

As Pontes, 10 de xaneiro de 2018O alcalde de As Pontes, Valentín González Formoso, asinou esta maña con reitor da UDC, Julio Abalde, un convenio marco de colaboración académica, científica e cultural que suporá a implantación, de xeito permanente, da institución universitaria no municipio.

O convenio supón, en palabras do rexedor “un paso histórico en prol de que As Pontes sexa capaz de sacar cabeza nun mundo cada vez máis tecnolóxico, onde o apetito científico debe formar parte do vocabulario diario e no que concellos tan industriais como As Pontes, con vocación de diversificar o seu tecido produtivo, poidan ter o seu papel, xogando a Universidade da Coruña un rol vital para axudarnos a ser unha referencia, apostando pola formación vencellada á sustentabilidade”.

Pola súa banda, Julio Abalde, reitor da UDC, apuntou que “para institución académica tamén é un fito importante a sinatura deste convenio marco de colaboración polo que a UDC sae da súa área xeográfica para instalarse en As Pontes e achegar as actividades, de formación e información, universitarias á toda a veciñanza”.

Este acordo entre ambas institucións ten como obxectivo facilitar o acceso da veciñanza de As Pontes á formación académica regrada e non regrada impartida pola UDC, promover actividades de investigación, divulgación e transferencia científica e actividades de extensión universitaria nos ámbitos cultural e deportivo así como calquera outra iniciativa orientada a espertar nos rapaces e rapazas da vila as vocacións tecnolóxicas científicas.

Os representantes de ambas institucións remarcaron que se trata da única aula de extensión universitaria e a segunda da provincia da Coruña e quixeron agradecer á veciñanza de As Pontes o esforzo para o seu mantemento, xa que “é unha gran aposta, que nos permitirá ler o futuro do ámbito enerxético, como socios colaboradores, coa mirada posta nas novas xeracións, para que se vencellen profesionalmente a sectores que se poidan establecer na comarca e contribuír a fixar poboación”

 

Universidade Sénior

A primeira colaboración entre a UDC e o Concello de As Pontes chegará da man do Vicerreitorado de Oferta Académica e Innovación Docente e a Universidade Sénior e do proxecto de democratización do coñecemento “Compartir experiencias e coñecemento”, dirixido a persoas maiores de 50 anos.

Trátase dun ciclo formativo, que se desenvolverá entre os meses de xaneiro e abril,  dividido en tres módulos centrados en aspectos relacionados coa eficiencia enerxética e a sustentabilidade social e económica, dentro de ámbitos como a historia, a sociedade, a bioloxía ou a educación, e a promoción de hábitos saudables, a prevención de riscos, a nutrición e a actividade física.

Cada seminario incluirá tres sesións teóricas, impartidas por profesores de la UDC, e unha sesión práctica que incluirá visitas a diferentes espazos de interese tales como Sargadelos ou o Lago de As Pontes, e unha clase práctica para aprender a controlar o estrés.

As persoas interesadas neste curso, que comezará o próximo 23 de xaneiro, xa poden formalizar, ata o 20 de xaneiro, a matricula a través da páxina web da UDC  https://www.udc.es/, con apoio desde o Concello a través dos técnicos de cultura e da Universidade Sénior.  A matrícula é de balde.